Monday, 10 October 2016

‘ప్రేమమ్’కు త్రివిక్రమ్ ముద్ర కూడా.

‘ప్రేమమ్’ సినిమా విషయంలో జరిగిన నెగెటివ్ పబ్లిసిటీ చాలా బాధపెట్టిందని అంటున్నాడు డైరెక్టర్ చందూ మొండేటి. అలాంటి టైంలో అక్కినేని నాగార్జున.. త్రివిక్రమ్ శ్రీనివాస్ లాంటి వాళ్ల ఫీడ్ బ్యాక్ తమలో ఆత్మవిశ్వాసం నింపిందని చందూ చెప్పాడు. చైతూకు తండ్రి కాబట్టి ఆటోమేటిగ్గా ‘ప్రేమమ్’ చూసి ఉంటాడు. పాజిటివ్ ఫీడ్ బ్యాక్ ఇచ్చి ఉంటాడు. ఇక త్రివిక్రమ్ విషయానికి వస్తే.. ఆయనకు అత్యంత ఆప్తుడైన ఎస్.రాధాకృష్ణకు చెందిన ‘హారిక హాసిని క్రియేషన్స్’ బేనర్ నుంచి వచ్చిన మరో బ్రాంచే ‘సితార ఎంటర్టైన్మెంట్స్’ అన్నమాట. ముందు ‘బాబు బంగారం’తో ఎంట్రీ ఇచ్చిన ఈ బేనర్.. రెండో సినిమాగా ‘ప్రేమమ్’ను తెరకెక్కించింది.

ఈ నేపథ్యంలోనే త్రివిక్రమ్ ‘ప్రేమమ్’ సినిమా రఫ్ కట్ చూశాడట. సినిమా చాలా బాగుందని.. మంచి విజయం సాధిస్తుందని భరోసా ఇచ్చాడట మాటల మాంత్రికుడు. సినిమాలో చిన్న చిన్న మార్పులు చెప్పడంతో పాటు ఒక చిన్న డైలాగ్ కూడా త్రివిక్రమ్ సజెస్ట్ చేశాడని చందూ చెప్పాడు. ‘ప్రేమమ్’ గురించి సోషల్ మీడియాలో వ్యతిరేక ప్రచారం జరిగినపుడు సినిమా మీద కొంచెం సందేహాలు కలిగాయని.. ఆ టైంలో నాగార్జునతో పాటు త్రివిక్రమ్ కూడా సినిమా మీద పాజిటివ్‌గా స్పందించడంతో తమకు మళ్లీ నమ్మకం కుదిరిందని చందూ చెప్పాడు. తన కెరీర్ మొత్తానికి సరిపడా స్ట్రెస్.. ఒక్క ‘ప్రేమమ్’కే అనుభవించానని.. చివరికి సినిమా హిట్టవడంతో ఇప్పుడు చాలా రిలాక్స్డ్‌‌గా అనిపిస్తోందని చందూ అన్నాడు

No comments:

Post a Comment